عاشورا ندن اونوتولماز؟ Aşura nədən unutulmaz? چرا عاشورا فراموش شدنی نیست؟

یا ایتها النفس المطمئنه ارجعی الی ربک راضیه مرضیه

بو سوز بلکه ایمام حسین(ع) گوره سویلَنه بیلَجاق اَن گؤزل سؤزدور.

چوخ زامانلار اؤز اؤزومه بئله فیکیرلَشیرَم کی یاشادیغمیز بو قارانلیق دونیادا کی هر گون مین لَر میلیونلار اینسان، آقا- خانیم، اوشاخ- قوجا، گَنج- یاشلی حق سیز یئره و اَن چیرکین و اَن  ظالیم یوللاریلا اولدورولورلَر،  نَدَن 72 اینسانین حق سیزجَسینه و ظالیم جَسینه اولدورولمه سی بو قدر عالم ده سس صدا سالیب، هر ایل یوز میلیونلار اینسانی اونلار گون یاسلی ائدیر اورَکلرینی کدرلَندیریر، گؤزلَردَن سیل یاشلاری آخدیریر، گوی لری چاپابیله جاق قدر هارایلار سالیر.

ایندی منیم بو سطیرلری یازدیغیم محرم آییندا هر گون اولدوغو کیمی خبرلر بئله دیر. بو گون عراق آدلانان اولکه ده، کربلانی ایچینه آلان اولکه ده، 170 اینسان آشیری گوروهلار اَلیله اولدورولدو صاباح بلکه 200 اینسان اولدورولَجاق بلکه داها چوخ. سوریه ده بو اوچ ایلین ایچینده اولَنلرین سایی سی 200 مین اینسسسسسسسااااااانیییییی آشمیش. 200 مین سوغانین باشینی کَسماغا نه قدر زمان لازیم دیر 200مین قوشو اولدورماغا نه قدر ظالیم اولمالی 200 مین اینسانی ، 200 مین جانی ، آللاهین امانت وریغی روحو هلاک ائتماغا نه قدر....

عراق، سوریه، میصر، یمن بوتون اورتا دوغو و بوتون دونیا دا سای باخیمیندان داها بویوک و داها چیرکین ظولملری یاشیر.

هَله بونلار بو نئچه گونون ظولم لری، تاریخ بویو باخسان،دونیا بیرینجی ساواشی دونیا ایکینجی ساواشی ، سویوق ساواش، ایسی ساواش،  فلیسطین، قاراباغ  .....

بونلارین هامیسن بیز گوروروخ، اِئشیدیریخ ، اوخویوروق و اونوتوروق. بس بو عاشورا ظولمو نیه اونوتولمور؟ نیه بیتمیر؟ هر گئچَن گون مین لر، میلیون لار اینسانین گؤزونو آغلادیر، قانینی قاینادیر هارایلاری داغلاری آشیب  فلک لری تیترَدیر.

بو اولای بیز شیعه لرده زامان آشیمیلا بیر تورَنه دوندوغو اوچون بویویوب یوخسا باشقا قایناقلاردان دوغور بو سینیر سیز دَنیز.

گلین بیرباشقا تابلویا باخاق. دونیادا ایندی هر زمان اولدوغو کیمی میلویونلار، بلکه میلیاردلار سئوگیلی بیر بیرینه عاشیق اولور، سئوگیلی سینه سنی سئویرَم، سنه عاشیقم دییر، سن اولماسان اولَرَم دییر اما  هیچ بیرینین آدیی دیییلمیر. تاریخ ده یالنیز بیر نئچه عاشیقین آدی عشقی تمثیل ائدیر. لیلی مجنون- اصلی و کرم- رومئوو ژولییت- فرهاد وشیرین.

نَدن؟

فرق بوردادیر کی او میلیونلار ، میلیادلار سنی سویرَم دییَن سئوگیلی لر او دادلی دوزلو سوزلری دییر، اما بیر چوخو بیر دوندوغوندا بیر داها گؤزلین گوردوغوندا سویلَدیقلارینی ناغیل کیمی اونوتور. بیر چوخو یار یولوندا بیر آجی بیر فیراق چَکدیغی زامان بیر آزاوتورور بیر آز کَدرلَنیربیر آز ناستولوژیک دویغو لار یاشییر  سونرا عشقینی زامان یئلینه سووروب اونوتور.

دوغرو سئون لرین سایی حقیقتان چوخ آزدیر و دوغرو یولدا دوغرو سئونلرین سایی داها آز.

دیلمیزده بیر مَثَل وار دییر" چوخلاری آتاسینین گؤزون چیخادار کی بیله سینه کوراوغلو دئسین لر اما کوراغلو دئمزلر کور کیشی نین اوغلو دییَرلر" . بلی جانیم گؤنشله ، یانیب سؤنَن چیراغین فرقی چوخدور. حقیقی سئویب ده سئوگی سینه وفالی قالیب دا سئوگی یولوندا جان وئرَنلریله، سئوگی نی رومانلاردان اوخویوب اوزلویَن لرین فرقی چوخدور. و اینسانلار هر زمان اوز دیرین ویجدانلارین دا بو خالیص سئوگی لره عاشیق دیر لر، بو دوپ دوغرو عشق لره، و اؤزَلیق له جانان سئوگی سینده یانان شمع لره. یانیب دا ایشیق لاریلا قارنلیق لاری قاچیردان عاشیق لره. نوح- ابراهیم – عیسی موسی و محمد و... حسین

و عاشورا  یالنیز 72 اینسانین مظلومیتینه گوره عاشورا اولمور سویله دیغیمیز کیمی دونیا هر گون بوندان 100 لر قات داها بویوک جینایتلر یاشاییر بلکه عاشورا  اَن دوغرو یولدا اَن دوغرو سئوگی ده عشقینی ایظهار ائدَنلرین تابلوسو اولدوغو اوچون تاریخده اونتولمازلیق و سیلینمَزلیق گییمی نی گییر.  او اینسانلارین اَن دَرین ویجدانینی ووران اویاندیران، قالخیزیب هارای چَکدیرن تابلوسودور. او یالنیز بیر اینسان دییل بیر گروه اینسانین سئوگی نین اَن یوکسَک ذیروه سینه چاتماسینین حیکاسه دیر. او اینسانین اوغلونون شیطانین " من آلودانام او توپراق دان، من اینساندان اوستونَم" دئدیغی ایدیعاسینا و عصیانینا تاریخ بویو، وئردیغی اَن گوزل جواب دیر. و تانرینین "من بیرشی لر بیلیرَم کی سیز بیلمیرسیز" سوزونون گرچک لَشمه سیدیر. او آچیقجاسینا اینسانلارا دییر، باخین اینسانلار بیر اینسانین باشینا بوندان بَتَر داها نه گَله بیلر؟ من پیغمبرین نوه سی اولان حسین بونو بوینوما آلدیم و ظولمه بویون اَیمه دیم. من و بیز عاشورایی لر دوغرو سئوگی نی سئچدیق دوغرو یولدا دایاندیق و یاندیق عاشورا گونَشینی یاراتدیق.

بلکه بونا گوره بیتمَز اونوتولماز سؤنمز اولدو عاشورا و کربلا