آذربایجانین دویوغولی شاعیری فاطمه عبدالجبار فرشبافی دن گوزل بیر شعر ( بیرآز تلخیص له)
سنی اینسان تانیرام من
قوی اشیتسین هامی اینسانلاری سومکدی مرامیم
اوجالار خلقیمی سومکله منیم شان و مقامیم
ای اولان شهرت و نامیم
کین توتان کوکسولری خانه ویران تانیرام من
سنی اینسان تانیرام من
گوزلیم یاخشی بیلیرسن کی، تک اللرده سس اولماز
آییق اولساق داها شیطان بیزیله هم نفس اولماز
داها زیندان قفس اولماز
سن سیز اولسام هامینی شهریده شیطان تانیرام من
سنی اینسان تانیرام من
بو نه حکمت دی طبیعتده کی یاشلا دولا گوزلر
اتمه ین جورمه، گوناها، نیه محکوم اولا گوزلر
نیه گول تک سولا گوزلر
دونیانین هر یرینی قورخولو زیندان تانیرام من
سنی اینسان تانیرام من
"گوزوم"، اوت یاشلارینی ، کوهنه بیین لرسنی قانمیر
غمینی بیلمیراینانمیر، سنی دانلیر، هیچ اوتانمیر
گوزلییم بوردا گرکدیر هامی گوزلر یاشین اوتسون
هامی ایلقارین اونوتسون
گوز، یاشین توکمه سه ده قلبیمی گریان تانیرام من
سنی اینسان تانیرام من
گوزلیم نغمه اوخو، بلکه سسین خلقی اویاتسین
بلکه بایقوش سسی باتسین، بلکه غم ضولمون آزاتسین
اوخو"احساس" سسینه سوزلرینه، غرق اولوب اویسون
دوزلوغی، حورمتی دویسون
سن اوخوبلکه بیری شورا گلیب تارینی چالسین
ایکی سس سسلر اولوب، سسلر اوجالسین
بلکه غم، غصه قوجالسین
اوخو ای شعریمه عنوان اولان ای قهرمان اینسان
سسینه سس وررم، اولما پریشان
قوپاراق شهریده توفان
اوخو، سس لن کی سنی مرغ خوش الحان تانیرام من
سنی اینسان تانیرام من
بیری سویلوردی کی شاعیر اوریینده نه کدر وار
دی گوروم بیر نه خبر وار
بئله قاندیم کی بو شعرینده خوشونتدن اثر وار
بئله سوزلرده خطر وار
دئدی یازما، قلمی سیندیریب آت، کاغذی یاندیر
سوزو معنانی اوتاندیر، اوزووه جهلی ایناندیر
بئله صحبت لری بیهوده و هذیان تانیرام من
سنی اینسان تانیرام من
هاوا توتقوندی ، قارانلیقدی ، کوچن کروانی سسله
سنی سنلن تانیان اینسانی سسله
گوزونو پارلاق اولان شمع لره مشعل لره تاپشیر
الینی، ال لره تاپشیر
دلی کونلونده بوتون واژه لری داده چاغیر سن
سوزو ایمداده چاغیر سن
غمه دوش سن آییق اینسانلاری فریاده چاغیر سن
سن سیز اولسام اوزومو مدبر دئوران تانیرام من
سنی اینسان تانیرام من
سن، سن اولسان داها هئچ کیم سنی سندن آیرامماز
قلبینه یاره ویرامماز
داها هئچ کیمسه سنه وئردیغی ایلقاری قیرانماز
سن گئدرسن منی ده سوزلره معنالره تاپشیر
منی گوی لرده اوچان سئومه لی عنقالره تاپشیر
سویو پاک دوم دورو دریالره تاپشیر
منی رویالره تاپشیر
تازا آچمیش نیگران قونچه لری سوزلره تاپشیر
دوز باخان گوزلره تاپشیر
چون سنی قونچه لره سئوگیلی باغبان تانیرام من
سنی اینسان تانیرام من
گوزلیم قول لاری چیرما، دئنه آللاهه توکل
بیرده کی چکدیغیمیز اودلی اولان آهه توکل
ای بو توفانلی دنیزدن اومیدیله گیچن اینسان
سوزو سوزدن سئچن اینسان
دلی جیرانلارا تای، داغ تپه لردن گئچن اینسان
سنی من حق دانیشان ، قوخمایان اینسان تانیرام من
سن اوزون سن، تانیرام من
سنی اینسان تانیرام من
دئدیم عقلیم منی دیندیر، گل اولاخ بیر
یالانی دوزدن آییر، خلقی سویندیر
سن حقیقت لری گور، گورمه ین اینسانا بیلیندیر
یازیرام اهل قلم شعریمی قانسین
کونلوم ایستر غم ائوی بوردا تالانسین
یاتان اینسانلار اویانسین
ایستیرم شعریم اولوب نورلو چیراغ، شهریده یانسین
وئرمه اوممیدینی الدن، بویوک اینسانلارا خاطیر
بوظولوم خانه ده حق سیز توکولن قانلارا خاطیر
بیرده ویجدانلارا خاطیر
گوزونو یومما آماندیر سنی سندن آییران وار
منی مندن آییران وار
سن گئدرکن، سنی حتی قارا یئل لرده خاطیرلار
سوزلی سازلاردا اولان نغمه لی تئل لرده خاطیرلار
سنی داغلاردان آشان معنالی سئل لرده خاطیرلارده
غملی ائل لرده خاطیرلار
غملی ائل لر نیگران سوزلره چوخدان یاریشیب لار
بوردا سئومک له، سئویل مک غمینه هی بولاشیب لار
گون باتارکن یولا دوش، قوی سنی ائل لر یولا سالسین
سنی گوزلردن آخان غصه لی سئل لر یولا سالسین
قارا یئل لر یولا سالسین
سن گئدرکن بیلیرم باغچادا گوللر سارالال لار
داها معنانی باخیشلاردان آلال لار
منده قلبیمده سنین دردینی بارلاندیران اوللام
اومیدیله سوزومو شعریمی پارلاندیران اوللام
دوزومو ائل لریمه آندیران اوللام
گئت اوزاقلاردا بوتون ماهنی لاریندا منی سسله
سارالان گولشنی سسله
"سنی اینسان تانیرام" شعری ده من سیزلره قالسین
اوز دیاریندا وطن سیزلره قالسین
و....
سنی اینسان تانیرام من
ساغول